بسم الله الرحمن الرحيم
أزيكم يا شباب
أنا شادى بخ
أو شاهينو
أول كلامى هبتدية بأول حب حسيت بية
الحب الأول على رأى روشة
بس الحب الأول بجد إللى قلبى حس بيها قبل ما اشوفها
إلى ودنى عشقت صوتها
وعشت شهور دقات قلبى ماشية مع دقاتها
أنا عارف طبعا أن الرومانسية مش هى حب الأم وحب الأب
لكن بما إننا فى عيد الأم
لازم نتكلم على الحب الأول فعلا من وجهة نظرى مش من وجهة نظر روشة
وأحب أقول لأمى كل سنة وأنتى طيبة يا أمى وربنا يخليكى ليا
وأحب أهديلك وأهدى لماما روشة وماما ميوشة (بإعتبار ما سيكون) قولوا يارب
ولكل أم هذة الأبيات
ليوسف معاطى
حبيبتى الوحيدة
حقيقتى الوحيدة
برغم انى يعنى معودتش صغير
ولا عودت واقف بشورتى القصير
وماسك فى ديلك
برغم انى بكبر
وباعرض وباطول
لكن لسه عيل
باعيط واجيلك
وتاعبك وراعبك وهادد فى حيلك
حبيبتى الوحيدة
حقيقتى الوحيدة
وانا لسه بيبى فى بطنك زمان
عرفت انك انتى اللى حتكونى امى
عرفت الحنان
وحسيت بانى بحبك بجد
وشفتك لوحدك
ولا شفت غيرك
ولا شفت بابا ولا شفت حد
ولا كنت لسه سمعت الاغانى
ولا عشقت تانى
وباكل فى اكلك
وصعب وانانى
ومستحملانى
حبيبتى الوحيدة
حقيقتى الوحيدة
بحبك ومنك عرفت الحنان
وصوتك فى ودنى ولا اسمهان
ياريت دعوتك تبقى ساعات الادان
عشان السما تبقى فاتحة البيبان
بحبك ومنك بعيش وارتوى
ياريت تغفري لى
ساعات كنت منك كده بتلوى
انا مش حااقولك جبال المشاكل
عشان انتى عارفة ان انا مستوى
بحبك 00 بحبك 00 بحبك قوى
حبيبتى الوحيدة
حقيقتى الوحيدة
انا شلت منك فى يوم السبوع
وعيطت جدا وسحيت دموع
م انا كنت نايم ومرتاح فى صدرك
وهايم فى حبك وكنت فى امان
لقيت بيتنا فجاة بقى مهرجان
قرايبك واهلك وحتى الجيران
وانا جوه منخل ولا البهلوان
ودق واغانى وتعبت ودانى
وملح فى قفايا ونار الشموع
انا شلت منك فى يوم السبوع
حبيبتى الوحيدة
حقيقتى الوحيدة
نور القمر حالك
وانا حالى من حالك
بتجينى ساعة الضيق
وبتفتحيلى طريق
وتخلى قلبى جرئ
والرب اوحالك
يبقى الحنان والدفا
والحب رسمالك
دايما قصاد عينك
دايما على بالك
ومسهمة على طول
يا امى ايه 00 مالك
ماتطلبيش النجوم
لاحسن هاجيبهالك
مشغولة بس بايه
مشغولة بعيالك
بتقربى وتتطبطبى
ولا تامرى ولا تطلبى
غير الزيارة للنبى
ولا تشخطى ولا تضربى
وانا لسه فى عيونك صبى
مهما كبرت
حبيبتى امى صاحبتى
يامنورالى دنيتى
ومعرفانى سكتى
مهما كابرت
انا لو فى يوم ماطلبتكيش وماشفتكيش
كانى متغرب 00 هاجرت
بحب فى عينيكى الحنان
وبحب فيكى الرضا
مقدرش احب حبيبتى اكتر من كده
لكن قدرت
وإلى لقاء أخر مع الحب الثانى والثالت والرابع..... إلخ إلخ إلخ
Falling hearts Here
16 comments:
يا شاهينو يا جااااااااااااااااامد
أكتر حركة جراءة وشجاعة أدبية عملتها من ساعة ما عرفتك يا شاهينو
بجد بوست يجنن
تسلم إيديك يا معلم
ومن موقعى هذا احب أهدى الأغنية دى لماما حبيبتى
يا عينى على الام وحنان الأم
لخال ولا عم يشيلوا الهم
صحيح يا شاهينو بقى قبل ما أمشى يعنى
جبت لمامتك إيه فى عيد الأم
ولا زى كل سنة؟؟؟؟
ههههههههههههههههههه
خلاص خلاص والله أخر تعليق
حد يبتدى أول بوست ليه ويقول فيه
أنا شادى بخ؟؟
طب إحنا وعارفين الفضايح دى كلها .. الجمهور الغلبان ده ذنبه إيه اول ما يدخل المدونة يتخض كده
هههههههههههههههههههه
انا ميوشة بخين بقى
هههههههههههههههه
محدش احسن من حد
جااااااااااااااااااامد يا شود بجد بجد بجد تفوقت على نفسك
انا حسيت احساس عجيب اوى يا اخى
تسلم دماغك اللى عمرى ماشكيت فيها
بقى معقولة يا روشة عمرك ما شكيتى فى دماغه
امال انا شاكة فيها على طول ليه؟؟
شااااااااااااادوووووووو
كل سنه وكل ام طيبه
جميل قوي كلام يوسف معاطي
تسلم ايدك
بخ
ميوش ربنا يخليكى
وربنا يكتر من تعليفاتك
وإية الأغنية الجامدة دى
عسسسسسسسسسسسسسسسسسسل
أة يا ميوش جبت هدية جامدة جدا
هى عبارة عن صينية رخام مرسوم عليها تعبان أخضر مطلع لسانة
ومكتوب تحتها كلمة بالصينى ربنا يستر معناها إية بقى
أنا أتخميت فى الهدية كنت بحسبها برواز
مطلعتشى لا برواز ولا حاجة
بس رغم كدة ماما فرحت بيها جدا وعلقتها على الحيطة قدامها
دة بالأضافة لأزازتين برفان
عطر أميرة ورائحة قمر
وطبعا الهدية مش بقيمتها لكن بمدلولها الذى يعبر عن مكنونات المشاعر والاحاسيس
طبعا أنا عارف أن صورة التعبان دى متتقدمشى حتى فى عيد حب أم العمال
لكن هعمل إية بقى خدت مقلب بالصينى
روشة
ربنا يخليكى
قولى لمى لحسان بتشك فى دماغى
كدة يا مى تشكى فى دماغى
وأنا أقول دماغى بتوجعنى لية أتاريكى بتشكى فيها
ولازم تعرفى يا روش أن بوستك هو إلى حفزنى أن أعمل بوستى
يلا يا ميوش مستنيين بوستك
أمممممممممممممممموة
أبو العريف
متشكر جدا على كلامك
وفعلا كلام يوسف معاطى معبر جدا حسيت أن هو بيتكلم على جميع المراحل إلى الواحد بيمر بيها مع أمة
وكل سنة وكل أم طيبة
لوووووووووووووولى
إفرحى يا بشرية .. شادى دخل وعلق
لوووووولى
مبروك تانى يا عم شود على البوست
وبعدين فيه حاجة بقى انا شاكة فيها
اوعى يا شادى .. حسك عينك بقك مناخيرك تكون ازازة عطر اميرة وقمر دى هى نفس الإزازة اللى كنا شارينها من يجى 15 سنة من عم راشد
يالهموى يا شادى دى زمانها عتقت على الأخر.. عتقت ايه بس.. دى زمانها عفنت ..الله يكون فى عونك يا خالتى
وبعدين صينية ايه ام تعيان مطلع لسانه دى .. انتى جايبلها هدية ولا عايز تحرق دمها
هههههههههههههه
شاهيييييينو
نصيحة اخيرة من اختك حبيبتك.. لو حصل بعد الشر وخطبت وحبيت تجيب هدية لحماتك فى عيد الأم.. ارجوك خلى خطيبتك هى اللى تنقى الهدية
لحسن حماتك ممكن متستحملش هدية من هداياك دى .. وبعدين الجوازة مش هتبوظ بقى علشان عيد ام يعنى
لما تتجوز ان شاء الله ابقى هات اللى انت عايزه
وكل سنة وانت طيب بقى
هى البت روووشة فين؟؟
يا روووووووووووووووشة
ميوشة
أكيد أنا هاخد بنصيحتك لأنى أضحك عليا جامد وشكلى كان وحش وماما بتحاول تفتحها وتقولى إية دة وانا مش عارف أرد
وبعدين يا مى مش هم نفس الأزازتين بتوع البرفان دول أتنين مختلفتين بس اول ما أديتهم لماما سمت واحدة عطر أميرة والتانية رائحة قمر
علشان الحكاية القدية دى بتاعت نجمة راشد راشد نجمة
يابرنس ياجااااااااامد قشطه ياماااان اخيرا عملوها الكبار ايوه ياعم كده فرحنا ببوستاتك الجديده بس انا عمال اتخيل منظرك ومامتك بتسألك على الهديه وانت مش عارف ترد هههههههههه
Post a Comment